الرئيسية

كيف تربط دومينك بمتجرك

5 خطوات بسيطة، من شراء الدومين لحد ما يفتح متجرك عليه. ما بتحتاج أي خبرة.

1

اشتري دومين

إذا ما عندك دومين، اشتريه من أي شركة دومينات. السعر عادة أقل من 15 دولار بالسنة.

NamecheapGoDaddyHostingerPorkbun
  • اختار اسم قصير وسهل، والأفضل ينتهي بـ .com.
  • ما بتحتاج استضافة ولا إيميل، الدومين لحاله بيكفي.
⚠️لا تشتري الدومين من Cloudflare Registrar، لأنه ما بيسمحلك تغيّر الـ Nameservers.
2

اكتب الدومين بحسابك

إذا لسا ما فتحت متجر: سجّل حساب، واكتب الدومين وإنت بتفتح المتجر.

إذا متجرك مفتوح: ادخل لوحة التحكم ← الدومين الخاص، واكتب الدومين واكبس إضافة.

3

انسخ الاسمين

بعد ما يتفعّل متجرك، بحسابك بيطلعلك اسمين (Nameservers)، وجنب كل واحد زر نسخ. شكلهم تقريباً هيك:

Nameserver 1
ada.ns.cloudflare.com
Nameserver 2
bob.ns.cloudflare.com

الأسماء الحقيقية بتختلف، انسخها من حسابك.

4

حطهم عند شركة الدومين

ادخل على حسابك بالشركة اللي اشتريت منها، وافتح إعدادات الدومين. دوّر على Nameservers واختار Custom، وامسح القدام والصق الاثنين الجداد:

هيك بتكون الصفحة تقريباً بأغلب الشركات. لشرح كل شركة لحالها:

GoDaddy
  1. ادخل على حسابك وروح على Domain Portfolio (دوميناتي).
  2. اكبس على الدومين، وبعدين DNS ← Nameservers.
  3. اكبس Change Nameservers واختار I'll use my own nameservers.
  4. امسح الموجودين وحط الاسمين اللي فوق، وبعدين Save.
Namecheap
  1. من Domain List اكبس Manage جنب الدومين.
  2. بقسم NAMESERVERS اختار Custom DNS.
  3. حط الاسمين اللي فوق، واكبس علامة الصح ✓ عشان يحفظ.
Hostinger
  1. من Domains اختار الدومين.
  2. روح على DNS / Nameservers واكبس Change Nameservers.
  3. حط الاسمين اللي فوق واكبس Save.
شركة تانية
  1. بإعدادات الدومين دوّر على كلمة Nameservers أو DNS.
  2. اختار Custom (مخصص)، وامسح كل الأسماء القديمة.
  3. حط الاسمين اللي فوق بس، واحفظ.
⚠️إذا في خيار اسمه DNSSEC مفعّل عند شركة الدومين، طفّيه أول، وإلا الدومين ما بيشتغل.
5

استنى شوي، والباقي علينا

التغيير بياخد عادة من 10 دقايق لكم ساعة، وأحياناً لحد 24 ساعة. النظام بيفحص لحاله كل 5 دقايق.

وبس يوصل…

متجرك بيفتح على دومينك مع القفل الأخضر (SSL)، وبتوصلك رسالة بلوحة التحكم وعلى تيليجرام إذا ربطته.

؟

مشاكل وحلول

مر يوم وما اشتغل

تأكد إنك مسحت كل الـ Nameservers القديمة وحطيت الاثنين الجداد بس، وإنه DNSSEC مطفي. وبعدين من لوحة التحكم ← الدومين الخاص اكبس "تحقق الآن".

عندي إيميل على الدومين

تغيير الـ Nameservers بيوقف الإيميل إذا ما نقلنا سجلاته. تواصل معنا قبل ما تغيّر.

بدي أفك الدومين عن المتجر

من لوحة التحكم ← الدومين الخاص اكبس "شيل الدومين"، وبعدين رجّع الـ Nameservers القديمة عند شركة الدومين.

افتح متجرك الآن